من الدكتور الشاعر صلاح عبدالله
إيه آخر السكة يا عب رحمن؟.
السكة تخوف ولا أمان؟.
السكة إلي إحنا رهنا نفوسنا عند الموت علشان نزرعها حرير.
السكة الناعمة، الخشنة إلي ابتديناها من التحرير.
... السكة الأم إلي اتبنت خطاوينا زمان.
إيه آخر السكة يا عب رحمن؟.
السكة إلي إحنا بدال ما نخطي عليها بالرجلين شيلناها فوق الروس.
السكة مليناها أرواح، وقلوب، وعقول ونفوس.
السكة إلي ترابها كان عارف أسامينا وحافظ شكل وشوشنا، وبيحذرنا إن شاف وسطينا جاسوس.
السكة إلي إحنا عشقناها ومليناها بحب لغاية ما طلع لها أحضان.
إيه آخر السكة يا عب رحمن؟.
السكة إلي إحنا استأمناها، وشهدناها زمان عالدم.
السكة إلي إحنا سمعناها بوداننا بتشهق وتسمي كل ما واحد من تحت العربيات يتلم.
وتزغرط لما إيدين تتشابك وأما رجول تنضم.
السكة إلي إحنا في عز الليل فضفضنا لترابها السهران.
إيه آخر السكة يا عب رحمن؟.
السكة ما بقيتش السكة.
ما بقيتش نضيفة بقت سَكة.
ما بقيتش تجد بقت تهزل.
وبقت تطلع، وبقت تنزل.
وبقت تتلولو تحت الخطوة ولا التعبان.
إيه آخر السكة يا عب رحمن؟.
من كتر الأقدام النجسة، السكة يا عب رحمن ضلت.
ما بقيتش تودي ورا، وقدام، وشمال، ويمين، السكة دي إيه أغمي عليها ولا اختلت!!.
السكة أم الضلة الدافية دلوقتي بتطرح شح.
السكة إلي انزرعت صحة وعافية نشفت وبقت بتكح.
عمركش سمعت بإن طريق جا له السرطان!!.
إيه آخر السكة يا عب رحمن؟.
كل إلي خرجنا نعلمهم أناشيد الحب، أما اتعلموا ينطقوا بلسانهم لعنونا.
كل إلي خرجنا نشيل السكين من أجسامهم طعنونا.
كل إلي خرجنا نعلمهم أحكام الصلاة، بقوا بيقولوا أما يبصوا لنا اللهم اخزيك يا شيطان!!.
إيه آخر السكة يا عب رحمان؟.
صدقني يا عبده، أنا مش خايف مالقناصة.
أنا خايف مالكدب إلي بيقتل أسرع من أي رصاصة.
خايف مالبيه المتأنتك، إلي من برا شغال إعلامي، ولا سياسي ومن جوا شغال رقاصة.
على وشه لكل زبون تعبير، وفي بقه لكل مناسبة لسان.
إيه آخر السكة يا عب رحمن؟.
الكدب طوفان، مش جاي مالسما، أو جاي مالأرض، دا نازل من كل عيون البهوات.
مش جاي من راديو وتلفزيون، الكدب بينزل في بيوتنا مالحنفيات.
الباشا معبي الكدب في بقه وجاي في وداننا وبيدلدقه.
وإحنا اتعودنا إن إحنا نقول له آمي واتعودنا إن إحنا نصدقه.
حتى ولو قا عالأخرس بيغني، أو قال عالمخصي بتاع نسوان!!!.
إيه آخر السكة يا عب رحمن؟.
بص يا عبد الرحمن حواليك، بص لدنيتنا المقلوبة.
شوف الأفراح المسلوبة.
شوف الأحلام المصلوبة.
إزاي هانغني الغنة الحلوةو كل السميعة بقوا بكم وسم؟.
إزاي نطمن ونغمض والإيد السودا حوالينا بتسمم حتى أغاني الطفل وحضن الأم!!!.
ومنين تيجي أحلام حلوة لعنين النايم عالبركان!!.
إيه آخر السكة يا عب رحمن؟.
السكة ماهيش تحت الرجلين، السكة يا عبده جوانا.
عارفين ملامحها وعارفانا.
هانخرجها من جوانا ونمشي عليها.
وإن رشوا الضلمة هانبقا إحنا ضي عنيها.
وهانرجع نغسلها بإيدينا من المأجور ومن الأبله.
ونوري الناس فين القِبلة.
واللقمة الدافية هانزرعها في بلاد الجوع.
وهانمحي بالحب الصادق وجع الموجوع.
ونشوف الإنجيل بعنينا في حضن القرآن.
دا آخر السكة يا عب رحمن.
قصائد اخرى للدكتور صلاح عبد الله مسموعة
توجعات
ليست هناك تعليقات:
إرسال تعليق